The Network under the Bright-Bright Sky

為咗見工，所以去咗幾日上海。唔計年幾前ACM-ICPC比賽來過交大的話，十幾年前來過一下旅行一下，同而家比，無疑硬件方面有好大進步，但係軟件真係仲差啲。唔知係咪應該高興呢？因為香港係呢方面仲有少少優勢。

一落機，排海關入境，海關慢都由自可，最睇得唔過眼就係啲人隨即攞起手機，高談寬論，係一個理論上應該要嚴肅的場合講電話，硬係覺得唔係咁妥當。

出閘到接機大堂，隨即有Warcraft 3 Mazing的感覺。門外圍起了一度度鐵欄，讓我們以之字形繞出去，好讓遊客隊伍以最長的周界與接機的親朋好友有個近距離接觸。

出市區打算去坐磁懸浮列車，唔覺意出左去汽車等候區，廢氣同埋煙味隨即撲鼻，先走返入機場避一避，好在去列車月台原來係有行人天橋連接過去的。

上行人天橋，都要行一段話遠唔遠話近唔近的路先到車站。中途有四條平行的自動扶梯，但只有最頭一條在運轉中，其餘的路程連燈光都比較暗。單程普通位位五十大元，有當日機票仲有十蚊Discount，但係好搞笑地開宗明義講明電子機票同埋登機證唔受理，都唔知係乜嘢Logic。

如果我無記錯的話，架車係德國有份參與製造的，但係除咗架車本身之外，其他軟硬件配套都貫切中國一貫水準。

列車最高時速為430km/h，當睇住隔離公路兩個方向的行車線上嘅車都係向後面飛過的時候又確係幾爽。

到站，行落去個有蓋的士站竟然要淋一下雨經過一段露天的樓梯。排隊的的士係多，但唔知點解有為數不少的吉的士都會唔停站輕鬆飛過。過咗一陣突然有堆的士飛站後在路邊路一來，司機紛紛擁出來的說。回頭一望發現原來隊中多咗四位金頭髮藍眼睛的老外在排隊，班司機即刻就以以為釣到大魚的心態過來chok錢。殊不知當中有位外籍女士操流利普通話對答，亦完全睇穿班司機的心態，其中一個司機讚佢中文講得唔錯，被女士以回贈一句「那裏那裏」。路途上的感受使我以為的士仲未規範用咪錶唔講價，所以都順利做咗姜太公。

翌日Interview，在快速公路上赫見快線中間有個工人狀似鬆線中，除了有輪比較顯眼的運泥手推車跟佢一齊之外，之前完全無任何跡象顯示會有一個咁樣的障礙物，莫講話一個警告牌、一個雪榚筒！無數汽車以90km/h係佢身邊擦身而過，真係配服佢一啲都唔驚。

係紫竹數碼港，雖然車就真係少啲，但係見到架垃圾車都係輕鬆響住Horn徐徐咁衝紅燈……唉，都只能夠講句「算吧啦。」

唔記得咗點解……前個幾星期有人提起網上有提及無線新聞片頭曲的巧妙設計，而我係兩年幾前都已經發現過。

講梗的係片頭曲開頭的時候，夾雜了”NEWS TODAY NEWS TODAY”的Morse Code。不過網上流傳的發現係”TODAY NEWS”，但我再三查證後確定真係”NEWS TODAY”兩次的呀。

怎至連中文Wikipedia的舊版都係講”TODAY NEWS”，所以我二話不說將之改正為”NEWS TODAY”，並剪了相關的錄音出來以茲証明。

話時話，Nokia諾基亞手機的預設 (是預設的嗎？) SMS響鈴－”… — …”，也就是SMS的Morse Code。

去完美國回程的時候順路停一停日本，反正都要係東京轉機，見免簽証入境又幾方便的說。打上NWA改機票加Confirm返張Open Ticket的日子，點知佢就話張Ticket係Unroutable，唔改得做出境，只可以轉機。跟手呀媽打去香港NWA問，係毫無阻撓的情況下順利攪掂，真係都唔知NWA點做嘢。

原來美國快餐連鎖店Denny’s係呢度都有分店，日本果間個Logo比較唔同樣同埋有啲Funny，本來都懷疑過係咪同一間，不過睇個Wikipedia之後相信係同出一轍。不過日本呢邊明顯係走較高級的生意，由於佢係我地所住的民宿樓下，非常就腳，服務員又通英語，所以都光顧咗兩次。對面有間通宵營業的即製便當外賣店，深夜時份光顧買宵夜，店中只有兩位比中年還要老一點的女士打點，一個做廚房，另一個負責樓面銷售，但一切都井井有條，乾淨企理。之前係市郊都見過有間7-11，早晨時間成間都係得兩個呀婆打點，但係好明顯完全無問題，真係配服。回想香港點解可以做唔到呢……

日本啲電車又係一件好過癮的事。列車差不多都係人手操作但係又可以非常準點，真係希望地鐵都有咁樣樣的時間表。咁岩有一次撞正司機 (運轉士) 訓練，佢啲指差確認姿勢做到十足十，相比香港的真係hea得多。

指差確認就是運轉士對訊號燈、指示燈、道路標示等以眼、口同埋手指作確認，是日本電車運轉的標準營運程序之一。

係台場的豐田汽車展覽場，有三分一間科學館咁大，重點係有免費試車，可以任揀一架車款係佢個好似駕駛學院的場地兜兩個圈，我個國際車牌總算有啲用處。 =P 其中一個部份係講Universal Design，講產品點樣設計以適合唔同人的使用，同埋整一個好的User Interface的要點，例如唔同的警告聲有乜嘢分別，支波棍應該點設計咁。後半部有展出有裝上各種老弱人士輔助設備的
豐田車，又係可以叫佢live demo玩，我地玩咗一下嗰張可以伸出來降落，方便老人家上落的椅子。反觀香港，好多時無論係硬體抑或係電腦軟體，都較少見有顧及Universal design。

話哂都來咗兩個學期，唔多唔少都要買少少手信。先去Katy Mill行咗個圈，但係真係行咗個圈都無咩特別嘢賣，最後只係買咗幾個Texas陶瓷杯墊。呀媽話燒烤醬靚，咁親戚嗰邊就買燒烤醬啦，反正每支都係兩蚊幾，平靚正。不過買一買就令我個行李重咗十幾廿磅，兩件行李加埋120磅，而Limit係每件50磅，即係無論如何點分配點擺都會超重，美國嗰邊好好彩隻眼開隻眼閉，但最後係日本出境時都係難途繳交超重附加費的厄運。

另有段小插曲：初頭唔識買咩醬好就求其買咗十支A1 steak sauce，之後D friend當然O哂嘴 (:O) 再帶我去Refund再買過。Refund嗰時佢俾返Cash我，但買嗰時我係俾Card的，順利賺咗1%的Instant Rebate rate，即係2個幾毫子美金，嘿嘿。

Dorm food雖然唔差，自助餐型式，All you can eat，但話說都成差唔多有廿蚊美金一日。整體來說都算唔錯，沙律吧常設的密瓜同哈密瓜算係我的最愛，仲有九種沙律醬任配。自助三文治整個飛邊全麥烘底花生醬吞拿魚牛肉三文治係宵夜最佳選擇。晚飯時有甜品供應，好嘅時候有Tiramisu，不過差極都會有Corn Cake，再唔係係雪櫃有無限雪榚雪條可以攞。行個啲有個粟米片麥片吧，十幾種五顏六色的Cereal並列你見過未？主菜方面日日唔同，除咗午餐一定會有Pizza之外，煎三文魚、雞牛扒、墨西哥菜算係好普遍，甚至有時會有亞洲菜、過節會有火雞添。最後飲品同樣選擇多，N種汽水加M種果汁，咖啡紅茶花茶應有盡有。

唯一唔滿意係啲亞洲菜比較古怪，有次雲吞入面有粟米紅蘿蔔做餡，咕嚕肉啲肉係煲湯用的豬肉、汁同豉油差唔多稀，照燒雞的汁用咗美國的燒烤醬去整……

臨走嘅時候當然要食返啲多少「美國菜」，雖然美國都好似無乜自己的菜色，但都唔只係薯條漢堡包。

Fogo，一間巴西來自助餐。最特別的地方係有好多侍應攞住唔同種類的肉串，好似酒樓推車仔咁係個食堂四圍走。只要將枱上的紙牌反去綠色”Yes”的一面，佢地就會好似烏蠅咁圍埋來，係手上的肉串切一片或者整一舊俾你。

肉除咗有雞豬牛羊，仲有唔同部位唔同煮法俾你揀。中間有個沙律吧，不過唔知係咪巴西味呢，兜咗個圈都搵唔到個似樣的生果食得呢。

仲有一樣好想再食啲就係Crawfish，狀似龍蝦但就好似賴尿蝦咁細隻。一桶桶咁Order。一上手就唔停得手，拆一隻食一隻，回味無窮。肉質似龍蝦但係就嫩得多，仲有少少膏，再以特設的醬汁煮成，辣得來啱啱好。中文可能係叫做小龍蝦，但香港唔覺有得食咁。

最後的晚餐係Hooters食，主打招牌菜係雞翼、雞翼、雞翼同埋啲穿比較少布的性格服務生，很攪笑的餐廳。

返到來香港一定要搵日去西貢長洲食一下久違的海鮮餐。=P