九方輸入法
Friday, June 23rd, 2006一直都對九方輸入法無乜好感，但係得知某啲中學中文打字因為收咗九方的支助而只教九方唔教倉頡，實在覺得唔開心。
點解唔鍾意？實際來講倉頡係打繁體字的公認標準，出到公眾電腦，要打中文倉頡一定有得揀；二來九方要放好多專注力落monitor睇住揀字先至得，仲一定要有numpad先掂，laptop上面唔加外置numpad會好麻煩；三來佢只係用右手，打得多真係手都痺。最後，倉頡係de-factor standard，人地只會承認倉頡為打字標準，就好似即使Dvorak好過QWERTY，但係始終成百年都無變。雖然我打字主要係用Dvorak同行列，但始終都唔會唔識QWERTY同倉頡。
以上都唔係令我最憎九方的原因，我最憎佢有版權同埋要收錢。試想下你係紙上面寫字要俾錢，用一種專利的筆先寫得出字，你一世都要靠佢先可以寫字，會係幾唔開心；萬一佢執笠，戓者唔賣會幾大鑊。
親戚話遲早電腦都會有手寫或者語音辨認，我地唔係專業打字唔需要再識得打字。我就認為直至電腦可以以全速認人聲之前，打字都唔會沒落，因為打字實實在在快過寫，亦同時係一種無聲的表達方法之一。似乎到呢一代，即使唔係專業打字員，都仲有學打字的必要。
Chinese
Cantonese
English